Yangiliklar

Universal bank Yevropa tiklanish va taraqqiyot banki (YTTB) tomonidan O‘zbekistondagi hamkor moliya tashkilotlari uchun tashkil etilgan iqlim masalalarida yetakchilik bo‘yicha birinchi forumda ishtirok etdi.

Ishtirokchilar banklar strategiyasi, risklarni boshqarish va kundalik qarorlar qabul qilish jarayonlarida iqlim omillarini hisobga olish masalalarini muhokama qildilar. Ushbu o‘zgarishlarni amalga oshirishda bank rahbariyatining roliga alohida e’tibor qaratildi.

Iqlim bilan bog‘liq loyihalarga investitsiya kiritishning iqtisodiy samaradorligi muhokamaning asosiy mavzularidan biri bo‘ldi. Ishtirokchilar mijozlarga bunday investitsiyalarning amaliy foydasini, jumladan, xarajatlarni kamaytirish, samaradorlikni oshirish va raqobatbardoshlikni mustahkamlash imkoniyatlarini tushuntirish muhimligini ta’kidladilar. Shuningdek, biznes vakillarining mavjud yechimlar haqida xabardorligini oshirish zarurligi qayd etildi.

Forum O‘zbekiston moliya sektorining iqlim bilan bog‘liq ustuvor yo‘nalishlari va imkoniyatlari yuzasidan ochiq fikr va tajriba almashish uchun maydon bo‘ldi.