«Universal bank» aksiyadorlik-tijorat banki 2001-yil 20-martda tashkil etilgan. Tashkil etilgan ilk kunlardan boshlab bank O‘zbekiston Respublikasi aholisi, tadbirkorlari va korxonalari uchun zamonaviy bank mahsulotlari hamda sifatli xizmatlarni taklif etuvchi ishonchli moliyaviy hamkor bo‘lishni o‘z oldiga maqsad qilib qo‘ygan.
Bank o‘z faoliyatini Farg‘ona viloyatining Qo‘qon shahrida boshlagan bo‘lib, asosiy e’tiborini hududiy biznesni qo‘llab-quvvatlash, tadbirkorlikni rivojlantirish va moliyaviy xizmatlardan foydalanish imkoniyatlarini kengaytirishga qaratdi. Ushbu yondashuv mustahkam mijozlar bazasini shakllantirish hamda bankning barqaror rivojlanishi uchun poydevor yaratishga xizmat qildi.
2003-yilda Universal bank Toshkent shahrida o‘zining birinchi filialini ochdi. Bu bank faoliyati geografiyasini kengaytirishdagi muhim bosqich bo‘ldi. Keyingi yillarda filiallar va mini-banklar tarmog‘i izchil kengaytirildi, ko‘rsatilayotgan xizmatlar ko‘lami muntazam ravishda kengaytirib borildi.
Shu bilan birga, bank zamonaviy bank texnologiyalarini faol joriy etdi. 2010-yillarning boshlarida Universal bank xalqaro pul o‘tkazmalari tizimlariga qo‘shildi. Bu esa mijozlarga xizmat ko‘rsatish imkoniyatlarini sezilarli darajada kengaytirib, bankning mamlakat moliya bozoridagi mavqeini yanada mustahkamladi.
Rivojlanishning navbatdagi bosqichi raqamli transformatsiya bo‘ldi. Bank masofaviy xizmat ko‘rsatish kanallari, mobil va internet-banking xizmatlarini izchil joriy etdi, ichki jarayonlarni avtomatlashtirdi, karta mahsulotlari va raqamli servislar qatorini kengaytirdi. Natijada mijozlarga xizmat ko‘rsatish sifati va tezligi, shuningdek, ichki biznes jarayonlarining samaradorligi sezilarli darajada oshdi.
Shu bilan bir qatorda, Universal bank korporativ boshqaruv, risklarni boshqarish, ichki nazorat hamda axborot xavfsizligi tizimlarini xalqaro ilg‘or amaliyotlar va zamonaviy bank sektori talablariga muvofiq ravishda takomillashtirib bordi.
Bank rivojlanish strategiyasida inson kapitaliga alohida e’tibor qaratiladi. Universal bank xodimlarni muvaffaqiyatning asosiy omili deb biladi va ularning kasbiy salohiyatini rivojlantirish, o‘qitish hamda kadrlar zaxirasini shakllantirishga tizimli ravishda investitsiya kiritadi. Shu maqsadda zamonaviy ta’lim dasturlari, «Universalbank Akademiyasi» korporativ ta’lim platformasi, rahbarlarni rivojlantirish dasturlari hamda uzluksiz malaka oshirish tizimi joriy etilgan.
Bank rivojlanishining yangi bosqichi 2025–2027-yillarga mo‘ljallangan Universal bank rivojlanish strategiyasi tasdiqlanishi bilan boshlandi. Mazkur strategiya bankning zamonaviy, ishonchli va texnologik moliya instituti sifatidagi mavqeini yanada mustahkamlashga qaratilgan.
Strategiya quyidagi beshta ustuvor yo‘nalishga asoslanadi:
- mijozlar tajribasi sifatini oshirish;
- raqamli transformatsiya va innovatsiyalarni joriy etish;
- biznesning barqaror o‘sishini ta’minlash hamda mahsulotlar qatorini kengaytirish;
- operatsion samaradorlikni oshirish;
- inson kapitali va korporativ madaniyatni rivojlantirish.
Bugungi kunda Universal bank korporativ va chakana mijozlarga muvaffaqiyatli xizmat ko‘rsatayotgan zamonaviy universal tijorat banki hisoblanadi. Bank ko‘p yillik tajriba, zamonaviy texnologiyalar va mijozga yo‘naltirilgan yondashuvni uyg‘unlashtirgan holda, O‘zbekiston Respublikasi bank tizimi hamda mamlakat iqtisodiyotining rivojlanishiga munosib hissa qo‘shishda davom etmoqda.
